ائله آنانین، بئله بالاسی!

ائله‌ آنانین، بئله بالاسی!


           یوخاری داناباش کندینده، آروادی اؤلموش آسلان آغا‌ ایکی اتجه‌ بالاسی- علی ایله ولی‌نی دیشینه آلیب بؤیودورکن، آشاغی داناباشدا، ایران خانیم  اری‌نین بیریجیک یادیگاری- آلتی آیلیق پارسانی باغرینا باساراق آغیر گونلر گئچیرمکده ‌ایدی. اوغوردان،بو ایکی طالئع‌داش بیر گون مینی‌بوسدا شهره گئدنده بیر بیری ایله تانیشیر، بو تانیشلیق ائولنمه‌ ایله سونوجلانیر. آسلان آغا دوگون قیییلیرکن ایران خانیمدان ایسته‌ییر؛ اوشاقلار آراسیندا عدالت‌له داورانیب اوچونه‌ده آنالیق ائله‌سین.  ایران خانیمدا الینی گؤزونون اوستونه قویوب اوشاقلارین آراسیندا اینصافلا، عدالت‌له داوراناجاغینا سؤز وئریر. گئرچکدن ده، ایران خانیم  عدالتلی بیر قادین ایدی. دئمک اولار اری‌نین اوشاقلارینا، اؤز اوشاغیندان آرتیقراق اؤزن گؤستریردی. اؤرنگین؛ او گونده ایکی تندیر چؤره‌گی بیشیریب اری‌نین اوشاقلارینا وئریر، اوز اوشاغینا وئرمزدی! علی ایله ولی آنالیقلاریندان، نییه پارسایا چؤره‌‌ک وئرمه‌دیگینی سوروشدوقدا، "گول بالالاریم  بونلاری تکجه سیزه بیشیرمیشم" دئیردی. سونرا بیرآز دوشونوب آرتیراردی:

-‌ اولماسا سیزده چؤره‌گینیز یاریسینی بؤلوب قارداشینیزا وئرین...

    یئر-یئمیشه گلینجه، یئنه بو اولای یئنه‌له‌نردی، علی ایله ولی بوتونو سئویملی آنالیقلاریندان آلارکن پارسا ایکی، یاریما یئتینَردی.

      اوشاقلار یئددی-سککیز یاشلارینا دولونجا، ایران خانیم هره‌سینی بیر ایشه گؤره‌ولندیردی؛ علی قویونلاری اوتارمالی، ولی چول ایشلرینه باخمالی، پارسا ایسه ائوده قالیب قارداشلاری نین مشق‌لرینی، درس‌لرینی یازمالی-اوخومالی ایدی!...

     بئله‌لیکله اوشاقلار بؤیویوب  اؤزلرینه گؤره بؤیوک بیر آدام اولدولار؛ علی کندین ‌چوبانی، ولی کندین بیچینچیسی، پارسا ایسه باشقان اولدو؛ اؤلکه‌نین تئلئویزیون باشقانی!...

***

     ایللر گئچدی. بیر  گون یوخاریدان، باشقان پارسایا بیر بویروق گلدی:

اؤلکه‌ده اولان، ائللرین دیل، تاریخ، کولتور، اویغارلیقلارینی یایماق اوچون اوستانی تئلئویزیون کاناللاری آچیلمالی دیر بونونلا سیزدن ایسته‌نیلیر قیسا سوره ایچینده بو گؤره‌ وی یئرینه یئتیره‌ سینیز....

     باشقان پارسا بویروغو ایلَتمک اوچون ائللرین  تمثیلچیلرینی یانینا چاغیردی.

     فارسلاردان باشقا، هامی گلمیشدی؛ تورک‌لر، تورکمن‌لر، عرب‌لر، بختیاری لر، لورلار، لک‌لر،  کوردلر، گیلک‌لر، مازنلی‌لر،تالیش‌لار، بلوچ‌لار،سیستانلی لار، تات‌ لار ....

تمثیلچی‌لرین بیری، "فارس‌لاری آرامیزدا گؤرمورم، اونلارین کاناللاری اولمایاجاق‌می؟..." دئیه سوروشدوقدا، باشقان گولومسوندو:

-‌ یوخ اولمایاجاق بو کاناللار یالنیز سیزین اوچوندور...

سونرا بیر شئیی آنیمسامیش کیمی اکله‌دی:

-‌  اولماسا سیز کاناللارینیزین یاری واختینی فارس‌ قارداشلارینیزا وئرین!...